20190913. Os maiores do concello de Boiro colaboran desde fai anos coa Oficina de Turismo exercendo de guías turísticos de diversas actividades no municipio baixo o programa ‘Paséate con Nos’. Esta semana remataron cunha visita á illa de Sálvora cos técnicos de turismo e unha comida co alcalde, José Ramón Romero, e a concelleira de Turismo, Marisa Collazo.
Elaboración de nasas, explicación do proceso de cría de mexillón, marisqueo, coñecer como funciona un estaleiro ou o funcionamento dun muíño de río son algunhas das actividades que estes maiores ensinan aos visitantes que cada verán chegan ao municipio boirense. A edil de Turismo, Marisa Collazo, manifestou que “con esta iniciativa o que se busca é a implicación dos nosos maiores no desenvolvemento turístico do municipio.”
O rexedor de Boiro, José Ramón Romero, expresou o seu agradecemento a estas persoas que “de maneira desinteresada nos achegan os seus coñecementos e lle mostran aos visitantes que veñen a coñecer Boiro a nosa tradición, a nosa cultura e a nosa historia.” Esta iniciativa desenvólvese desde varios anos atrás e xera moito interese entre os visitantes, traducíndose nunha maior demanda.
