20190911. Coincidindo co inicio das festas patronais de Santa Uxía, o salón de plenos do Concello de Ribeira acolleu o acto de entrega das distincións aos mellores xardíns das nove parroquias que conforman o municipio.
Os obsequios consistentes nun ramo de flores e nunha placa foron entregados polo alcalde Manuel Ruiz; a concelleira de Medio Ambiente, Elvira Pereira; a súa homóloga de Cultura, María Sampedro; e a edil de Servizos Sociais, Ana Ruiz.
O rexedor expresou o seu agradecemento a toda a veciñanza que contribúe ao embelecemento do concello a través de “pequenos detalles que intentan cambiar lugares.” Deste xeito, manifestou que “sempre hai algunha persoa, algunha familia, que diferencian un lugar de outros.”
As persoas galardoadas foron Josefa Lorenzo Martínez (Palmeira), O Corral de Prego (Oleiros), Estrella Martínez Parada (Castiñeiras), Ramona Paz Muñiz (Aguiño), María Dolores Sampedro (Carreira), María José Montemuiño (Corrubedo), Ana Martínez (Olveira), O Forno de Artes (Artes) e Zum Zum (Ribeira).
Así mesmo, procedeuse ao outorgamento dunha placa coa que se distingue a unha colectividade, neste caso integrada pola familia Docampo, con residencia na avenida Miguel Rodríguez Bautista, esquina rúa Cordieiro.
