20190913 O Festival Internacional Outono de Teatro de Carballo, o FIOT, foi presentado este mércores no seus detalles, na vila bergantiñá, nun acto cos medios nos que se puxo o foco na nova web do certame (www.fiot.gal, que se estreou esta semana oficialmente) e nos principais fíos temáticos da edición 2019 do certame: a solidariedade, o feminismo, as periferias e na diversidade.
Tamén se fixo saber que haberá 38 espectáculos, dos cales 9 son estreas absolutas e 8 estreas no país. Entre estas estreas figura Medida x Medida, de Producións Teatrais Excéntricas, adaptada e dirixida polo dramaturgo ribeirense Quico Cadaval. Esta estrea absoluta será o 4 de outubro. O FIOT celebrarase entre os días 27 de setembro e 1 de novembro.
O espectáculo Medida x Medida, cuxa preestrea está programada para a Illa de Arousa o día 20 de setembro, é un dos grandes acontecementos teatrais galegos da tempada, en palabras da organización do FIOT “unha das propostas máis salientábeis das nosas compañías”. A estrea abrirá o Programa de Sala o venres 4 de outubro. A nova creación de Producións Teatrais Excéntricas, que está a celebrar o seu 15º aniversario, achegará un punto de vista novo, xenuinamente noso, sobre o legado artístico de William Shakespeare: o punto de vista retranqueiro, espontáneo e irreverente de Quico Cadaval, que xa ten ás súas costas certa experiencia de deconstrución e reconstrución arredor da obra do escritor inglés (por exemplo a través da obra Shakespeare para ignorantes).
