20190919 Podemos Galicia está a informar do seu apoio integral á Emerxencia Feminista e ás concentracións da Noite Violeta que se celebran este venres nunha vintena de localidades galegas, incluída (tal e como sinalamos hoxe mesmo en O Barbanza) a cidade de Ribeira (que acollerá a partir das 21.00 horas, con punto de partida na praza do Concello, unha mobilización de loita contra a violencia machista).
Verónica Hermida, secretaria de Feminismos de Podemos Galicia, lembra que o obxectivo da participación do seu grupo na Noite Violeta é “denunciar a intolerábel restrición de dereitos e liberdades que padecen as mulleres”.
Amais de en Ribeira, as concentracións levaranse a cabo noutras 19 vilas e cidades galegas e en arredor de 200 de todo o ámbito estatal. A orixe da mobilización está na declaración da Emerxencia Feminista proclamada en Alacante o pasado 20 de agosto, ao que cómpre engadir a necesidade de de denunciar a interminábel listaxe recente de mulleres vítimas da violencia machista (entre as que se atopan as tres mulleres asasinadas esta mesma semana en Valga).
A secretaria de Feminismos de Podemos Galicia, Verónica Hermida, manifestou hoxe “o apoio total do partido a esas convocatorias”, ás que asistirán os cargos orgánicos da formación. “No mes de xullo, unha muller foi asasinada cada dous días. Van máis de corenta no que levamos de ano. Os delitos sexuais medraron un 50% entre xullo e agosto, denúnciase unha violación cada seis día horas, é dicir catro ao día, e no que levamos de 2019, duplicouse o número de violacións con respecto a anos anteriores. Alguén pensa que podemos falar de normalidade?”, subliñou Hermida.
As concentracións da Noite Violeta en Galicia celebraranse en A Gudiña, Ames, Arteixo, Cambados, Cangas, Cee, Compostela, A Coruña, O Courel, Cuntis, Ferrol, Foz, Lalín, Marín, Miño, Mondariz, Noia, Ourense, Padrón, Pontevedra, Poio, Ribeira, Teo, Vedra, Verín, Vilagarcía e Vigo.
