20190924 O espectáculo Invisibles, de Redrum Teatro, segue a súa xira por Galicia, achegando o mellor das nosas artes escénicas ao tempo que sensibiliza á cidadanía sobre a necesidade de pecharmos fileiras arredor da violencia de xénero. O espectáculo, protagonizado polas coñecidas actrices Mela Casal, Sheyla Fariña e Nieves Rodríguez, pasará pola nosa comarca antes de iniciar a xira estatal, a partir de xaneiro de 2020.
Máis polo miúdo, fará recaladas en Lalín, A Estrada, Cambados, Ferrol, Boiro (o 18 de outubro), Poio, A Coruña, Bueu, Ribeira (o 1 de novembro), Muxía, Oroso, Bergondo, Vilalba, Mugardos, Santa Comba, Vigo, Outes, Tomiño, Caldas de Reis, Lugo, Monforte, Neda, Palas de Reis, Boqueixón, Ponteareas e Redondela.
Invisibles, dirixida pola actriz e directora Marián Bañobre, é unha adaptación da novela homónima da periodista Montse Fajardo que relata sete historias reais de violencia de xénero vividas por sete mulleres galegas, usuarias na súa maioría do Centro de Información á Muller do Concello de Pontevedra.
O espectáculo é unha coprodución entre Redrum Teatro, a Concellaría de Igualdade do Concello de Pontevedra, o Centro Dramático Galego e a Deputación da Coruña; e foi a gran triunfadora nos Premios de Teatro María Casares deste ano, acadando os galardóns a Mellor Adaptación, Mellor Dirección e Mellor Iluminación (este último para a iluminadora Laura Iturralde, converténdose na primeira muller premiada cun María Casares nesta categoría). Recibiu tamén o Premio Luisa Villalta a Proxectos de Igualdade concedido pola Deputación da Coruña.