20190910. Coincidindo co inicio do curso político, os alcaldes e voceiros do Partido Popular (PP) na zona do Barbanza amosaron nunha xuntanza mantida en Ribeira a súa “profunda preocupación” polo retraso que o Goberno central mantén na transferencia de preto de 1’5 millóns procedentes da actualización dos fondos de Estado aos concellos desta área.
Ao encontro asistiron o presidente provincial, Diego Calvo; a secretaria provincial, Rosa Gallego; e o vicesecretario xeral de Organización e Territorio, Evaristo Ben, trasladándolle os rexedores a dificultade que suporá esta situación para a elaboración dos presupostos locais ante a falta dos recursos derivados da participación de ingresos do Estado e do resto de recursos financeiros que corresponden ás entidades locais, en concreto, aos concellos da comarca.
Ademais, insistiron en que todo isto suporá que deban, por exemplo, “recorrer a fondos propios para abonar o incremento dos soldos dos funcionarios cando os concellos non reciben o incremento derivado das actualizacións dos seus ingresos.”
Desta maneira, engaden que “necesitamos saber cando imos a recibir o que nos corresponde. Non estamos pedindo nada que non sexa noso, pero necesitamos esas partidas para seguir ofrecendo servizos básicos aos nosos veciños.”
Así mesmo, cualifican de “falacia” o argumento esgrimido polo executivo central de que sen presupostos do Estado non se pode facer efectiva a transferencia dos citados fondos, considerando os populares que “se o goberno central non tivo reparos en aprobar Reais Decretos para crear novos dereitos económicos que fixeron estoupar o teito de gasto non financeiro do Estado, agora non poden negarnos estas partidas que resultan fundamentais para os nosos municipios.”
Por outra banda, o presidente provincial aproveitou para subliñar que a súa formación está preparada para, “no caso de ser necesario, afrontar uns comicios xerais o próximo mes de novembro.”
Finalmente, Diego Calvo sinalou que “creemos que sería unha irresponsabilidade por parte de Pedro Sánchez, pero xa estamos acostumados a que, lonxe de velar polos intereses de tódolos españois, se preocupe só polos seus” facendo fincapé en que o PP “leva tempo traballando” para que os cidadáns vexan na formación “a única alternativa ao populismo e ao independentismo para conseguir un goberno estable.”
