20190923. O BNG da Pobra do Caramiñal levará a pleno unha moción relativa á derrogación da LOMCE e á adopción de medidas que garantan a igualdade de oportunidades.
A formación política cualifica a LOMCE dunha “lei fondamente centralizadora, clasista e sexista, favorece a mercantilización da educación e afonda nun modelo moito máis autoritario e antidemocrático. Ademais, a LOMCE representa un ataque frontal ás competencias das comunidades autónomas e supón unha involución inadmisíbel ao negar a realidade plurilingüe, pluricultural e plurinacional do Estado español e vetar o dereito de ofrecer o seu propio modelo lingüístico.”
Os nacionalistas engaden que a estes datos súmanse ” os nefastos efectos da LOMCE en termos de desgaleguización, de deterioro dos dereitos de profesorado e alumnado, a tendencia cara un ensino elitista e clasista que perde o seu carácter laico e a perda de peso do galego na educación pública, tamén da man do ‘decreto do plurilingüismo’ aprobado polo PP que impide usar o idioma propio no ensino de materias como matemáticas, física ou química.”
Deste xeito, consideran que a política educativa exercida polos gobernos central e autonómico “promove o desvío de fondos que deberían ser destinados á mellora da educación pública a colexios privados concertados, moitos deles confesionais e que segregan ao alumnado por ‘sexos’.”
Tamén fan referencia ás noticias sobre o resultado destas políticas, exemplificándoo con “colexios que prohiben o uso de pantalón no uniforme das nenas, sentenzas que avalan a presenza da materia de Relixión católica no currículo do bacharelato”, entre outros.
Así mesmo, apuntan que as políticas de Feijóo implicaron “unha asfixia do ensino público”, polo que desde o partido entenden como “imprescindíbel” a adopción dunha serie de medidas para que a educación pública volva “ofrecer un ensino de calidade que garanta a igualdade de oportunidades para todo o alumnado, laico e en galego.”
Por todo isto, o grupo municipal pobrense do BNG propón á corporación a adopción dunha serie de acordos nos que figura esixir que a Xunta da Galicia solicite ao goberno do Estado a derrogación da LOMCE e a supresión da Relixión do currículo escolar; instar a defender “as nosas competencias en materia de ensino para fortalecer un ensino público, galego e de calidade que potencie a diversidade lingüística e fomente a lingua propia do noso país”; solicitar recuperar a gratuidade universal dos libros de texto; e requirir a modificación da ratio de alumnado por aula en tódolos niveis, “de maneira que non supere a cifra de 15 escolares na etapa infantil, 20 na etapa de ensino obrigatorio e 25 nos cursos de bacharelato, incluíndo ao alumnado que repita curso.”
