20190924. O grupo municipal do BNG ribeirense levará a pleno unha moción relativa á construción dunha nova Biblioteca municipal pública. O voceiro do Bloque, Xosé Vázquez Cobas, expuxo que “non é unha proposición para esixir ou para pedir unha mellora, esas mocións xa as temos feitas ao longo dos anos.” O nacionalista fixo referencia ao ano 2010, cando un grupo de usuarios se pechou nesta instalación polo horario.
Vázquez Cobas manifestou que o espazo actual “non reúne as condicións para unha cidade como Ribeira”, así que a formación considera que “non merece a pena arranxar” ao entender que “non da máis de si.” Deste xeito, propoñen a construción dunha nova biblioteca “moderna, dotada con tódolos servizos necesarios” enumerando unha sala de lectura, sala de estudo, servizo de préstamo, ludoteca, sala dixital, sala de actos, etcétera. Ademais, o voceiro nacionalista precisou que buscan un lugar “accesible” en tódolos eidos, comprendendo a acepción de “cercana, próxima, con personalidade propia, cun edificio propio, no centro da cidade ou nun sitio céntrico, onde os veciños poidan entrar e que forme parte do tecido urbano.”
Vázquez Cobas insistiu en que propoñen a construción dunha “nova biblioteca para Ribeira, acorde aos tempos nos que vivimos e ao que a cidade merece.” Así mesmo, confía en que os demais grupos da corporación municipal voten a favor desta proposta porque “as cidades e o benestar dos cidadáns non se miden só polo nivel de renda, nin porque teñan acceso a unha determinada infraestrutura, senón tamén se miden pola súa cultura e, para que unha cidade sexa culta, ten que ter unha biblioteca en condicións, é unha cousa imprescindible” co obxectivo de “dinamizar a cultura e para que os cidadáns de Ribeira teñan acceso a unha cultura de maneira próxima, cercana.”
