O BNG de Boiro lamenta que non prosperase a mellora das áreas de autocaravanas

12 Setembro 2019

20190912 O BNG de Boiro vén de emitir unha serie de valoracións sobre o desenvolvemento do pleno celebrado este 11 de setembro, do que dimos conta hoxe en O Barbanza informando dos seus detalles e poñendo de manifesto a proposta do grupo nacionalista para arranxar, mellorar e impulsar o mantemento das dúas áreas de estacionamento de autocaravanas coas que contan as praias do concello. Finalmente, a proposta non foi aprobada.

O BNG lamenta que non prosperase a iniciativa porque, de levarse a cabo os traballos de acondicionamento, Boiro fortalecería a súa capacidade para facerse cun tipo de turismo “cada vez máis emerxente e menos estacional”, cousa que se podería conseguir “cunhas mínimas intervencións e cun axeitado mantemento”.

O grupo nacionalista local requiría a aplicación das seguintes medidas: nivelación das parcelas (para que funcionen correctamente as neveiras e os colectores de desaugadoiros), dotación de puntos de electricidade para as prazas, colocación de pilóns para químicos, recolocación de zona de baleirados, ensanchado na entrada e na saída da área de praia Xardín, promoción turística axeitada por parte de Arousa Norte e do Concello e acceso directo a unha información detallada dos espazos para autocaravanas.

A segunda moción do BNG fixo referencia ás medidas a adoptar fronte á emerxencia climática, alentando a participación do Concello na mobilización do 27 de setembro. Esta iniciativa foi aprobada por unanimidade, “cousa que nos satisfai gratamente”, explicaron fontes do partido, engadindo que se trata da primeira pedra para dar forma ao programa local de accións en defensa do medio ambiente.

Outros artigos

Publicidade

Revista en papel

Opinión