20190911 Unha das grandes exposicións galegas que van de servir de avance e antesala do Xacobeo 21 é sen lugar a dúbidas Galicia, un relato no mundo, que poderemos ver a partir do 8 de novembro no Museo Centro Gaiás (Cidade da Cultura). A mostra, o primeiro gran acontecemento expositivo do ano santo, proponse como un achegamento pormenorizado á relación entre a Galicia que coñecemos, a “oficial”, e todas as demais “Galicias” que configuran o resto do mundo. Un planeta que tamén se concentra aquí, nas nosas catro provincias e nosos nosos concellos, deixando a súa pegada. O punto onde máis fala por si soa esta interacción é onde pon o foco esta mostra comisariada polo barbanzán Manolo Gago (Palmeira, Ribeira, 1976), profesor de Xornalismo na USC amais de comunicador, historiador, novelista e blogueiro.
A exposición será, tamén, un centro de gravidade: un punto de atracción de todo tipo de pezas de alto valor simbólico para “a historia e a cultura do noso país” que chegarán por vez primeira a Galicia e que se atopan, arestora, repartidas por diversos recantos do mundo. Segundo informan dende a Fundación Cidade da Cultura, co-organizadora da mostra, esta brindaranos a oportunidade única de contemplar nun mesmo acubillo obras chegadas de institucións como a Cambridge University-Parker Library, a Biblioteca Apostólica Vaticana, a Biblioteca de Arezzo en Italia ou o Museu Nacional de Arqueologia de Portugal. Entre as pezas concretas que nos visitarán atópanse obras como o Libro das Invasións (onde se atopa a primeira mención que se coñece do noso personaxe lendario Breogán, quen foi quen tivo o privilexio de albiscar Irlanda dende o faro de Brigantia) ou o cancioneiro da Vaticana, piar fundamental da poesía galaico-portuguesa.
A mostra tamén ofrecerá ao público galego a posibilidade de contemplar obras como os Liber Sancti Iacobi da Biblioteca Vaticana e da Universidade de Salamanca (dous dos tres únicos calistinos iluminados ademais do orixinal de Santiago que se conservan no mundo) ou, tamén, o Mapa de Sawley, acubillado na Cambridge University-Parker Library, un importante documento que revela o coñecemento do reino de Galicia en Europa no século XII, no transcurso da Era Compostelá (datado cara a 1190, contemporáneo do Pórtico da Gloria, o mapa sitúa a catedral de Santiago coma o edificio máis importante de Europa, ilustrándoa nun tamaño incluso maior que a Basílica de San Pedro de Roma).
