20190912 O Goberno galego vai destinar máis de 1,9 millóns de euros en axudas para a limpeza e mellora das superficies forestais da comarca do Barbanza. Así o fixo saber hoxe o delegado da Xunta na Coruña, Ovidio Rodeiro, no transcurso dunha xuntanza coa alcaldesa de Muros, Inés Monteagudo, reunión que se complementou coa visita a varias áreas do concello onde a Consellería de Medio Rural ten proxectado facer accións silvícolas de roce para a prevención de lumes.
Amais de Muros, que recibirá máis de 268.291 euros para levar a cabo 20 actuacións, tamén haberá apoios para actuacións (mellora de pistas, rozas e acondicionamentos de devasas, etc) nos concellos de Porto do Son, Boiro, Rianxo, Lousame, Noia, Serra de Outes, Carnota, Ribeira, A Pobra do Caramiñal e Mazaricos.
Ovidio Rodeiro aproveitou a visita para facer balance das achegas que a Consellería do Medio Rural destina á comarca do Barbanza, que recibirá como dixemos máis de 1,9M€, contía que tamén se destinará a mellorar a capacidade de rexeneración dos bosques (fomentando a prevención de incendios) e a incrementar a capacidade de adaptación e valor ambiental dos montes: unha ducia de actuacións en Rianxo, Lousame, Porto do Son, Ribeira e Muros grazas a un investimento de máis de 172.000 euros.
Medio Rural tamén financiará a creación de superficies forestais para a plantación de árbores coníferas e frondosas Nos concellos de Lousame e Rianxo terán achegas por máis de 18.000 euros para levar a cabo dúas plantacións deste tipo.
Polo que respecta ás actividades das comunidades de montes e sociedades de fomento forestal (SOFOR), recibirán subvencións as entidades de Boiro, Carnota, Lousame, Mazaricos, Muros, A Pobra, Porto do Son, Rianxo e Ribeira. En total, estanse levando a cabo 27 actuacións, cun orzamento de máis de 189.000 euros, que teñen como obxectivo previr os danos causados aos bosques por incendios ou desastres naturais.