20190920. Ribeira albergará unha nova edición da Mostra de Teatro do 27 de setembro ao 5 de decembro. A venta de entradas e bonos está dispoñible desde a última semana de xullo na Casa do Concello, en horario de 09.30 a 13.30 horas de luns a venres. Agora só quedan 9 butacas dispoñibles do total do aforo do Auditorio municipal e hoxe é o último día para mercar o bono que abrangue as 11 sesións cun custe total de 25 euros, polo que cada unha sae a 2’27 euros.
Por outra banda, a partir do luns 23 poderase comprar a un prezo de 4 euros a entrada para a función Normas para saber vivir na sociedade actual, de Sarabela Teatro, programada para o venres 27, ás 21.30 horas.
Esta convocatoria trátase da mostra máis longa da última década en Ribeira, pois un total de 11 compañías profesionais laureadas co Premio de Teatro María Casares serán as encargadas de achegar esta rama das artes escénicas a través das súas diversas obras.
Sarabela Teatro levará Normas para saber vivir na sociedade actual o venres, 27 de setembro; Redrum Producións con Idiota o venres, 4 de outubro; Malasombra con Bernarda o venres, 11 de outubro; Ibuprofeno Teatro con Casa o’ rei o venres, 18 de outubro; Dinamo Producións con Eu queríame casare o venres, 25 de outubro; Redrum Producións con Invisibles o venres, 1 de novembro; Producións Teatrais Talía con Vida de cans o venres, 8 de novembro; Contraproducións con A compañeira de piso o venres, 15 de novembro; Produción Excéntricas con Carpe diem o venres, 22 de novembro; A Panadería con Elisa e Marcela o venres, 29 de novembro; e De Ste Xeito con Running o xoves, 5 de decembro. Da mesma maneira, tentarase que o colofón corra a cargo do Grupo Municipal de Teatro de Ribeira.
