20190917.- A conserveira de Ribeira adquiriu o 50% da empresa lusa A Poveira, unha firma con 80 anos de historia asentada no norte de Portugal, en concreto en Póvoa de Varzim. A operación péchase case catro anos despois de que a compañía fundada polo Banco da Coruña, Iglesias Corral e Otero Goyanes e administrada desde case os seus inicios por Ramiro Carregal, iniciase un plan de expansión para reforzar a súa presenza internacional coa creación dunha rede de filiais no exterior.
A Poveira é a terceira maior conserveira portuguesa e facturou 24,2 millóns en 2018 e algo máis de 20 millóns en 2017. A adquisición permite a FRINSA, incrementar peso no mercado luso, onde algunhas das maiores conserveiras asentadas no territorio, como a italiana Generale de Conserve (con centro en Vila do Conde) ou a tailandesa Thai Union (con planta en Leiria), destinan a práctica totalidade da súa produción á exportación fóra da Península Ibérica.
A conserveira de Póvoa de Varzim estaba en mans de catro socios: o presidente, Rui Ferreira (26,8%), António Cunha (26,8%), Gonçalo Moreira, fillo do alcalde do Porto (26,8%); e Sérgio Real (19,6%). Os dous últimos venderon a totalidade da súa participación polo que deixan a administración da empresa, avanzou o medio luso Expresso.
O importe da operación non transcendeu, aínda que fontes do mercado indican que a venda se pechou por unha contía entre 9 e 10 veces o ebitda da empresa lusa, un prezo superior á media do sector aínda que por baixo dalgunhas vendas recentes, como a da conserveira Albo á pesqueira chinesa Shangai Kaichuang. A Poveira pechou o seu último exercicio cun ebitda de 1,36 millóns e unha marxe bruta de 6,1 millóns.
s
