20190918. O Concello de Boiro iniciou esta mañá as actuacións de ampliación e mellora do ximnasio da Piscina Municipal, unha intervención que consideran “moi necesaria e demandada polo número exponencial de usuarios que ten a instalación.” O proxecto contempla duplicar o tamaño do existente, chegando case aos 200 metros cadrados, e facelo con criterios de sustentabilidade ambiental e redución de consumos enerxéticos.
A nova cimentación efectuarase cun sistema realizado a base de plásticos reciclados e as novas paredes contarán con ‘Termoarcilla Eco-III’, que emprega materiais cerámicos cun alto contido de elementos reciclados. A estrutura cuberta será de madeira laminada e rematada cun panel que permita o máximo illamento térmico co obxectivo de evitar que se acaden temperaturas moi altas no interior.
A iluminación, a base de lámpadas tipo LED, de máximo rendemento e duración, sinalan que reducirá nun 60% o consumo actual. Tamén indican que o novo sistema de renovación do aire suporá un aforro enerxético, xa que se empregará unha estrutura dinámica de renovación que permite unha calidade do aire interior óptima.
O orzamento total da obra é de 81.000 euros e o prazo de execución está previsto para unhas dez semanas aproximadamente. Durante tres delas faranse obras exteriores, polo que se poderá compatibilizar o uso da instalación actual “para prexudicar o menos posible aos usuarios.”
