20190911 As Festas da Guadalupe de Rianxo marcan o remate da traca festeira do verán xunto ás do Nazareno da Pobra do Caramiñal e as de Santa Uxía en Ribeira (que comezan hoxe). Este ano, os festexos rianxeiros por excelencia celébranse do 13 ao 20 de setembro cunha ampla programación para tódalas idades, tendencias, gustos, inquedanzas e intereses. A axenda deste vén con moitos puntos destacábeis, tal e como sinalou estes días a organización das festas e mailo Concello, pero, malia o complicado de elixir unhas cantas citas ineludíbeis, non se poden deixar de salientar as verbenas (incluída a verbena infantil), o festival Rock in Rian, o Feirón Mariñeiro ou a mostra de arte urbana e tradicional. Quen queira festa, vaina atopar, e quen queira algo máis, tamén o vai atopar.
De feito, segundo sinala o colectivo organizador das celebracións (a Asociación Sociocultural A Moreniña, co apoio patrocinador do Concello de Rianxo), un dos elementos que fai especialmente grandes as Festas da Guadalupe é que son algo máis ca música e baile, moito máis ca iso: son unhas festividades de enriquecemento cultural nas que calquera, teña os gustos e as tendencias que teña, pode sentirse a gusto e reflectido. “Queremos que o programa non cese en ningún momento do día, que haxa actividades dende a mañá até a noite, que non se interrompa a nosa aposta pola cultura nas súas facetas máis diversas”, sinalaron estes días as organizadoras e organizadores, poñendo o foco no amplo abano de xéneros, temas e propostas que abrangue o programa festivo: dende as vertentes máis clásicas (bandas de música populares, oficios, xogos tradicionais) até as máis modernas e innovadoras (cultura urbana, monólogos do certame local de creación audiovisual Youtubeir@s, etc).
Os festexos comezan o venres 13 coa Festa dos 80 que conta cun concerto, ás 23.00 horas, de Broken Peach e, ás 01.00, sesión Video DJ dos 80 e 90 a cargo de Mínimo Eventos.
A troula continúa o sábado 14 cunha forte presenza musical, pois o Rock in Rian trae a La Duendeneta, Festicultores, Mekánika Rolling Band, Ebri Knight, Dios Ke Te Crew e Reincidentes. Así mesmo, ten lugar o Encontro de Corais con Atalaia da Laxe, Polifónica Padronesa e Abraira de Asados.
O domingo 15 navéganse as augas da ría de Arousa con motivo da procesión marítima, acto principal cuxas orixes se remontan ao 1862, xornada primordial para a romaría e a tirada dos fogos de artificio acuáticos.
As bandas de música que forman parte da programación son a Unión Musical de Meaño o sábado 14, a Municipal de Silleda o domingo 15, a Banda de Arca o luns 16, a Escola de Música de Rianxo o martes 17, a Cultural de Arcade o mércores 18 e a Banda de Música de Noia o venres 20.
Por suposto, haberá baile e música tradicionais a cargo de Río de Anxo e Fogo Fatuo o sábado 14, Buxaina e Vai de Roda o domingo 15, Xilbarbeira e Noite Folc o xoves 19 e Pedra da Aroña o venres 20.
Tampouco poden faltar as orquestras e grupos, congregando no seu cartel a un total dezaseis que asumen a tarefa de amenizar as verbenas: Platinum e La Bamba o sábado 14; Tokio, Dilema e Furia Joven o domingo 15; Abanico e América de Vigo o luns 16; Cinema e Kubo o martes 17; Ciclón e Assia o mércores 18; Costa Dorada e Panamá o xoves 19; e Metrópolis, Alkar e Charleston o venres 20.
Por outra banda, as charangas contribúen a animar o ambiente o mércores 18 con Charanga NBA e o xoves 19 con Cé Orquestra Pantasma.
Enmarcadas nas actividades que se desenvolven no Artella! atópanse a xincana familiar para o sábado 14; cultura urbana con parkour, slackline, freestyle football e BMX flatland para o martes 17; xogos e obradoiro de circo para o mércores 18; e inchables, tren e festa da escuma para o venres 20.
O programa tamén inclúe monólogos e teatro. Os primeiros están programados para o martes 17 con Blanca e Tinta e Miguel Silva, máis coñecido por Aquel-e; mentres que Ghazafelhos asume a responsabilidade de dar vida á obra A illa sen tesouro o mércores 18.
Como antesala do derradeiro día de celebracións, o xoves 19 lévase a cabo a Noite Folc que conta con Lumieira, Os Melidaos e Tiruleques; ademais do Feirón Mariñeiro, A Feira de 1919, un dos pratos fortes destas xornadas. Rianxo retrocede así un século, engalanándose de época para reflectir o seu pasado. Esta feira de artesanía inclúe a mostra de produtos e oficios tradicionais para que non caían no esquecemento, así como música, gastronomía e obradoiros. Todo isto contando coa participación da veciñanza para dar lugar a unha cita única.
Unha cita única que será aínda máis especial e sobranceira o día seguinte, o día 20 de setembro, cunha actividade que pon o foco nos grandes co-protagonistas das celebracións: as nenas e nenos. Estamos a falar da Verbena Infantil, que se celebra na dita xornada no Cabo da Vila a partir das 23.00 horas (baile con sorpresas) e colle impulso despois coa actuación de Pakolas, o sobrenome do artista Paco Cerdeira, sen dúbida un dos músicos galegos actuais preferidos pola rapazada (autor do libro-disco Pakolas, editado por Galaxia, éxito de vendas, público e crítica en 2017). A Verbena Infantil rematará un pouco despois da media noite (sobre as 0.30 horas, coa rianxeira infantil, o canto colectivo entoado pola cativada que virá acompañado de variñas de luz para acrecentar o ingrediente máxico da actividade).
E como broche de ouro a oito días de festa transcorre o venres 20 o Rianxo on Fire con Hernia Eskrotal, Copa Turbo, Glitchgirl, Nüca e The Conspiracy; e como colofón as bengalas entoando A Rianxeira.
