As mesas electorais de Cabo de Cruz e Boiro serán obxecto de cambios de cara ao 10-N

20190926. O Concello de Boiro levará a cabo uns cambios nas mesas electorais de cara as eleccións xerais do 10 de novembro de 2019 e as posteriores, co obxectivo de “mellorar a accesibilidade dos cidadáns aos colexios electorais e exercer o seu dereito ao voto.” Así, os núcleos nos que se procederá á realización de modificacións son Cabo de Cruz e Boiro. Tamén estaba previsto desenvolvelas en Comoxo, pero sinalan que, por cuestión de prazos, non foi posible.

Deste xeito, as mesas electorais da parroquia do Castro, que ata o de agora estaban repartidas entre a Casa do Mar e o Colexio de Infantil e Primaria de Santa María do Castro, pasarán a agruparse todas no Centro Social de Cabo de Cruz. Mentres, no centro de Boiro hai un total de dez mesas que, ata o de agora, se repartían en dous espazos, pois sete estaban no Centro Social e tres na Casa da Cultura. A partir das eleccións do 10 de novembro, todas elas estarán agrupadas nunha mesma área, no Polideportivo de A Cachada.

Por outra banda, en Comoxo hai só unha mesa situada no Colexio de Educación Infantil e Primaria Pazos-Comoxo, a cal estaba previsto trasladala ao Museo Etnográfico. Este cambio estaba autorizado pola Asociación de Veciños que xestiona o centro, mais, debido á urxencia coa que se convocaron os comicios de novembro, desde o Consistorio manifestan que “non deu tempo a facelo efectivo pero si se levará a cabo nos vindeiros.”

O 30 de setembro farase pública no Boletín Oficial da Provincia da Coruña (BOP) a relación das mesas electorais, incluíndo o territorio que comprende cada unha. O prazo de exposición pública do censo electoral é do 30 de outubro ao 7 de novembro, período no que se poden facer as reclamacións administrativas sobre os datos censuais. As consultas poden realizarse no Rexistro Xeral do Concello, dentro do prazo indicado, en horario de 09.00 a 13.30 horas, ou nos teléfonos 981217439, 981217426 e 901101900.