20190906. A Pobra do Caramiñal volverá estar en festas do 13 ao 16 de setembro con motivo do Nazareno. O alcalde Xosé Lois Piñeiro anuncia que contarán “co operativo de seguridade mellor da historia” con barreiras arquitectónicas fronte a calquera tipo de atentado con vehículos a alta velocidade, pero a maiores desde o Concello fíxose un plan de autoprotección cunha empresa que realizou un estudo dos riscos potenciais que se poden producir na procesión mediante o que se solicitou á Axencia Galega de Seguridade (Axega) un camión de Posto de Mando Avanzado (PMA).
O vehículo estará situado na praza Maior, con tres cámaras distribuídas polo percorrido da procesión máis unha que estará no propio camión, gravando todo e converténdose no centro de control onde estará presente o mando da Garda Civil, Policía Local, Protección Civil e a asistencia sanitaria. Debido á conexión vía satélite permitirá unha coordinación moi rápida, polo que, ante calquera suceso, estarase preparado para a intervención de maneira áxil. A área encargada desta xestión foi a Concellería de Seguridade Cidadá, a cargo de José Andrés Lojo Fernández.
Outra das novidades será a instalación dun Punto Lila co obxectivo de contribuír a uns festexos libres de agresións sexistas.
