20190917. O 21 de outubro dará comezo un novo curso das Escolas Deportivas Municipais de Inverno do Concello de Ribeira, onde haberá catorce especialidades: Multideporte-Psicomotricidade, Kempo, Ximnasia Acrobática, Atletismo, Ximnasia Rítmica, Tenis, Baloncesto, Patinaxe, Pádel, Iniciación ao Fitness, Boxeo, Nada e Corre, Taekwondo e Voleibol.
Cada curso ten un prezo anual de 58’10 euros, existindo bonificacións por número de fillos, e a data de finalización establécese na última semana de maio.
O sistema de inscricións muda en relación a edicións anteriores. Así, primeiramente haberá un prazo de anotación para as persoas que participaron no 2018-2019, desenvolvéndose do 23 ao 27 de setembro. A renovación outorga dereito a reservar praza na mesma actividade, grupo e horario nas que se participou o anterior ano. A renovación poderase formalizar de maneira presencial na oficina de Deportes da Fieiteira, en horario de 09.00 a 13.30 horas.
As novas inscricións terán lugar entre o 7 e o 11 de outubro. Os interesados poderán anotarse cubrindo cos seus datos un formulario en liña a través da páxina web www.riveira.gal ou tamén en persoa na oficina de Deportes, onde os empregados utilizarán o mesmo formulario para garantir a orde de solicitude.
Máis información na páxina web do Concello, a través do correo electrónico deportes@riveira.com ou na propia oficina de Deportes da Fieiteira, en horario de atención ao público de 09.00 a 13.30 horas, con teléfono 981873646.
