20190926. A cuarta edición da Subida á Curota nas modalidades de atletismo e ciclismo -BTT e bicicletas de estrada- chega ao municipio pobrense o 5 de outubro. Organizada polo Concello da Pobra do Caramiñal e a Asociación de Atletismo e Deportes do Barbanza, esta cita congregará a numerosos deportistas -federados e non federados- que deberán completar unha distancia de 9 quilómetros.
As modalidades participantes para a carreira a pé son Sub-20, Sénior, Máster 1, Máster 2 e Máster 3; para a BTT son Júnior, Elite, Máster 30, Máster 40 e Máster 50; e para bicicleta de estrada son Cadete, Júnior, Sub-23, Elite, Máster 30, Máster 40 e Máster 50.
A saída será da praza Maior, establecéndose as 17.00 horas para a BTT -cada minuto, un participante-, as 18.15 horas para a carreira a pé -conxunta- e as 18.30 horas para as bicicletas de estrada -cada minuto, un participante-.
Por outra banda, a meta situarase no estanque do Alto da Curotiña para as bicicletas e no Alto do Miradoiro da Curotiña para a carreira a pé.
Unha vez rematado o evento, os deportistas serán trasladados en autobús ao lugar de saída para proceder á entrega de agasallos aos cinco primeiros clasificados por categoría, así como os trofeos aos que ocupen o podio con premios económicos de 150, 100 e 75 euros segundo o posto.
Os interesados dispoñen ata as 23.59 horas do 2 de outubro para inscribirse a través da páxina web www.emesports.es, aboando un total de 6 euros. Tamén se pode solicitar máis información no departamento de Deportes, situado na Casa da Cultura e Xuventude Raquel Fernández Soler, en horario de 09.30 a 14.30 horas, ou mediante os teléfonos 981832590, 981831545 e 619229946.
A organización conta coa cooperación da Garda Civil, Policía Local e Protección Civil para garantir a seguridade e bo desenvolvemento da proba. Ademais, colaboran Centro Sport/Deportes Maniotas, Motoclub Sin Frenos, Transportes Autos Barbantia, Publicolor e Sport Bike.
