A ferida do vento, de Riveiro Coello, centra a vindeira sesión do Club de Lectura de Boiro

20190926 A novela curta A ferida do vento, que narra en clave de semi-ficción (nela, a liña que separa o biográfico do inventando preséntase fina e complexa de albiscar) a primeira mocidade en Xinzo de Limia do escritor Antón Riveiro Coello, será o eixe arredor do que xire a vindeira sesión do Club de Lectura da Biblioteca Municipal de Boiro, unha actividade mensual para estreitar as ligazóns da comunidade lectora local, e tamén para xerar un espazo onde compartir experiencias creativas. A cita está fixada para o vindeiro 24 de outubro, ás 18.30 horas. Ao longo desta semana aínda estará aberto o prazo para inscribirnos na actividade.

Riveiro Coello, escritor limiao pero boirense de adopción, rendeu en A ferida do vento, unha das súas máis recentes novelas, unha sentida homenaxe ás xentes de Xinzo e a súa contorna, boa parte dela tocada polo vento que corre libre pola chaira de Antela, xentes que acompañaron a súa nenez e a súa mocidade e entre as que se inclúe outro novelista referencial das nosas letras, Carlos Casares, que na novela de Riveiro Coello figura como un personaxe máis e que chega a deixar pegada en parte do argumento (un tributo, tamén, a A rapaza do circo, un dos contos máis célebres da nosa literatura, incluído en Vento ferido de Casares).