20190918. O gobernador de Ceará (Brasil), Camilo Santana, visitou hoxe a Escola Oficial Náutico-Pesqueira de Ribeira, acompañado pola directora xeral de Desenvolvemento Pesqueiro da Consellería do Mar, Susana Rodríguez, e polo delegado territorial da Xunta na Coruña, Ovidio Rodeiro. Deste xeito, a delegación do estado de Ceará coñeceu as instalacións da man do director da escola, Pedro Riveiro. O centro colabora coas empresas da zona para que o alumnado poida realizar as súas prácticas en contornas reais de traballo e tamén coas confrarías de pescadores de cara a impartir os cursos náutico-pesqueiros dirixidos aos profesionais do sector.
Susana Álvarez manifestou que “intentaremos amosarlle toda a nosa formación marítimo-pesqueira, como está organizada e como se desenvolve para darlle servizo a un sector que é moi demandante.”
Pola súa parte, Pedro Riveiro indicou que “lle amosaremos tamén o que son os itinerarios formativos porque a estrutura do ensino profesional aquí vai ser moi diferente ao que teñen no Brasil, e imos poñer en valor como estamos organizados, desde o punto de vista marítimo-pesqueiro, como é o ensino regrado e non regrado, que tipo de oferta educativa temos e, logo tamén, que poidan ver as instalacións.”
Ovidio Rodeiro expresou que “Galicia é unha potencia pesqueira e, concretamente, esta comarca. Polo tanto, creo que a colaboración que ten tamén unha compañía galega con empresa neste estado do Brasil é o que vén a intensificar esta relación e esta cooperación.”
A Escola Oficial Náutico-Pesqueira de Ribeira depende da Consellería do Mar e comezou a funcionar en maio de 1993. Ten como misión impartir ensinanzas náuticas e marítimo-pesqueiras nas ramas de ponte e máquinas. Entre as súas instalacións, o centro dispón de aulas taller de seguridade e primeiros auxilios, electricidade, electrónica e automatismos, oleohidráulica e pneumática, aula de soldadura e tamén aulas de axuste e torno e de motores. Conta ademais con laboratorio e simuladores de navegación e pesca, de comunicacións, de máquinas e de frío e cálculo de refrixeración directa e indirecta.