20190916. O curso escolar comezou a semana pasada para os cativos de educación infantil e primaria na comarca do Barbanza. En Boiro, a concelleira de Educación, María Outeiral, visitou nos primeiros días tódolos centros de ensino do municipio para observar o estado das instalacións e reunirse cos directores co obxectivo de coñecer as necesidades e demandas do alumnado e familias, así como atender as deficiencias das escolas.
Desde o goberno local sinalan que traballaron “contra reloxo para que todo estivese a punto” de cara ao inicio das clases nos colexios de Educación Infantil e Primaria, ademais de nas Galiñas Azuis pero, “aínda que se resolveron as cuestións máis urxentes”, hai algúns centros nos que “quedan materias pendentes en algunhas cuestións” que, segundo afirmou a edil “iremos resolvendo en canto nos sexa posible.” Así mesmo, María Outeiral engadiu que “desde o Concello estámonos involucrando en todo o que está na nosa man para a mellora e mantemento dos centros escolares, de maneira directa ou a través da Consellería de Educación.”
A partir de hoxe tócalle afrontar un novo ano académico á rapazada de secundaria e bacharelato, comezando mañá as clases en horario normal nos tres Institutos de Educación Secundaria (IES) do municipio, os cales serán visitados nos vindeiros días pola concelleira coa mesma pretensión que nos centros citados anteriormente.
