20190910. A sección sexta da Audiencia Provincial de A Coruña emitiu hoxe un auto no que acorda prohibir a divulgación total ou parcial a través dos medios de comunicación do vídeo da gravación da reconstrución de feitos practicada durante a investigación da morte de Diana Quer.
A Audiencia sinala que “a restrición da publicidade” desta dilixencia xustifícase para preservar a imparcialidade dos candidatos a xurado.
O maxistrado presidente do tribunal tomou esta decisión trala solicitude dos avogados da familia de Diana Quer de suspensión da emisión do vídeo que tiña previsto ‘El programa de Ana Rosa’ en Telecinco.
O auto insiste na “eventual, e non improbable, difusión segmentada e non íntegra da proba e a súa eventual e non improbable presentación nun entorno de comentarios, explicacións ou valoracións, expresas ou implícitas, que poden afectar negativamente ás condicións para o debido desenvolvemento da función atribuída legalmente aos xurados.”
Así, o maxistrado considera innecesario aclarar que partes do vídeo afectan á dignidade ou intimidade das vítimas. Respecto disto, o xuíz indica que a recreación física do suceso co emprego dun manequín “xustificaría unha restrición da súa publicidade masiva e indiscriminada para amparar os intereses das vítimas.”
