20190812 Volven as festas de Cando lle Cadra do lugar de Teira en Corrubedo, porque, como ben din os organizadores, volven cando lles cadra pero sempre regresan. Quen ande pola vila mariñeira estes días verá a rechamante e ben feitiña cartelería da festa repartida por tódalas rúas, recantos e paus da luz estratexicamente situados cantos hai: un cartel completo de actividades para xente de todas as idades e gustos e que serve para conmemorar e reivindicar outro xeito de facer celebracións (sen día fixo no calendario pero cunhas ganas de pasalo ben que, pola contra, si que resultan fixas e determinantes).
A XXIV Festa de Cando Lle Cadra celébrase este sábado 17 de agosto a partir das 20.00 horas, da man da veciñanza de Teira (Corrubedo) e da asociación Corrubedo XI Séculos de Historia (coa colaboración da Concellería de Cultura de Ribeira e o Restaurante Valverde). Haberá vertente gastronómica (croquetas de cocido, bocatas de xamón asado e xerras de bebida: sangría, calimocho, viño, refrescos e cervexa), vertente lúdico-infantil (con inchables de balde para a rapazada) e vertente musical. Esta última comezará sobre as 21.00 horas cun concerto de música tradicional a cargo de Os Monifates, para seguir logo co grupo festeiro A Tajea. A sesión musical enfiará a recta final a partir das 23.30 horas, co show musical de Alberto, un vello coñecido da festa de Cando lle Cadra. A xolda rematará, como de costume, cunha gran queimada de confraternidade gratis.
