Vinte e un cativos introducíronse nas novas tecnoloxías na aula CeMIT de Ribeira

20190816. A concelleira de Innovación Tecnolóxica de Ribeira, Ana Barreiro Rego, procedeu esta mañá á clausura dos primeiros cursos infantís de introdución á informática, que baixo o título ‘Agosto Dixital’, está a organizar o Concello este verán na Aula CeMIT.

A acción formativa estivo dirixida a nenos e nenas de 6 a 9 anos. A pesar de que no inicio ía a haber un único curso, dada a alta demanda, duplicouse, dando cabida a dúas clases diarias con participación de 12 e 9 alumnos respectivamente. Ana Barreiro entregou aos pequenos cadanseus diplomas acompañada do axente TIC responsable da xestión da aula, Manuel Bello.

Do 20 ao 30 de agosto haberá un novo curso sobre novas tecnoloxías, desta vez orientado a rapazada de 10 a 14 anos.