Unha xornada festiva e cultural para conmemorar a figura de Valle-Inclán

20190823. A Pobra do Caramiñal prepárase para unha gran celebración o domingo, 1 de setembro. O motivo é a Festa do Centenario de Valle-Inclán na Curota, pois cómprense 100 anos daquela fotografía onde o escritor aparece subido nun carro de vacas nunha romaxe organizada pola veciñanza pobrense para festexar que o feito de que trasladara o seu domicilio ao municipio, declarando na prensa nacional e internacional que se convertía así en residente. Para tal efeméride, a vila trasladarase ao pasado a través dunha ampla programación e 12 horas de troula ininterrompidamente. No acto de presentación estiveron o alcalde, Xosé Lois Piñeiro; a concelleira de Cultura, Patricia Lojo; o director do Museo Valle-Inclán, Antonio González Millán; e Patricia Ríos representando a Eiradela Asociación Cultural.

A edil destacou que se pretende “destacar a figura de Valle-Inclán fóra do Museo, que se viva na Pobra do Caramiñal, polas rúas, darlle esa visibilidade que ten e que é tan importante para nós.” Tamén fixo fincapé no xantar campestre no miradoiro de Valle-Inclán, nos roteiros, na música tradicional que percorrerá os distintos emprazamentos e no mercado tradicional que se instalará no Cantón da Leña. Patricia Lojo engadiu que agardan que esta cita teña continuidade, pois “cremos que esta festa pode ser moi importante, a parte de para A Pobra, para outros concellos.”

Na súa intervención, o director do Museo sinalou a relevancia desta iniciativa non só para a vila, senón tamén para a comarca do Barbanza, as Rías Baixas e, incluso, toda Galicia. González Millán lembrou que 1919 é un ano significativo para Valle-Inclán, pois publica grandes obras coma Divinas palabras, El pasajero ou La pipa de kif. Deste xeito, o escritor traía ao concello prensa, pintores, escultores, etcétera. Así, quixeron utilizar este reclamo para facer unha actividade que sirva de tránsito entre as celebracións de agosto e as de principios de setembro “desde unha maneira respectuosa con Valle-Inclán, xa que é unha figura de ámbito internacional, e cunha programación de calidade.” Polo tanto, agardan que se converta nunha “festa propia, característica e cultural se o público pouco a pouco se vai sumando.” Ademais, anunciou que unhas “espontáneas” repartirán doces entre os asistentes, haberá un bululú e figurantes de Ramón del Valle-Inclán, Josefina Blanco Tejerina e Victoriano García Martí.

Por outra banda, Patricia Ríos, en representación de Eiradela Asociación Cultural, foi a encargada de detallar as características desta cita. Desta maneira, o mercado tradicional ambientado na época estará montado no Cantón da Leña ao redor das 11.00 horas, contando con palilleiras, sancosmeiros, oleiro e postos de comida e bebida, entre outros. Media hora máis tarde, comezará o roteiro pola vila. Ao mesmo tempo, procederase a unha romaxe itinerante cos grupos Arume, Tanxedoira e Lumieira. Despois, ás 13.00 horas, “o noso Valle-Inclán terá un acto protocolario e recibimento no Concello polo alcalde e a concelleira” para trasladarse ao Cantón da Leña onde, en torno ás 14.30 horas, rematarán os actos da mañá para efectuar a saída ao miradoiro de Valle-Inclán. Alí haberá unha polbeira e actuación a cargo de Arrancadeira, Caramiñas, Trécola e Os Caraveiros. Posteriormente, ás 19.30 horas, baixarase novamente á Pobra para un pasaprazas por parte de Arrancadeira e Caramiñas para, ás 20.00 horas, asistir ao contacontos coa curta galega Malpocado, por Mariló Ríos. Máis tarde, chegará Luís Prego cos obradoiros con Xogos e cantares de onte para os rapaces de hoxe e Bótalle un punto na festa. A charanga Faíscas da Pontraga e unha queimada porán o broche final á xornada festiva e cultural.

O encargado de pechar o acto foi o rexedor, quen indicou que “hoxe para min é un día moi satisfactorio porque isto empezou a prepararse fai moito tempo xa e dáse a circunstancia de que as dúas Patricias teñen moito que ver.” A transcendencia de ambas radica en que Patricia Ríos propuxo a recreación e Patricia Lojo “como nova concelleira de Cultura está desexando apoiar e crear unha nova actividade dentro da nosa programación cultural e creo que o seu pulo foi moi importante.” De feito, quixo expresarlles o seu agradecemento por todo o traballo realizado, así como a Antonio González. Así mesmo, incidiu na relevancia de Valle-Inclán para a literatura universal e o Concello pobrense.

Para acceder ao miradoiro onde se celebrará o xantar campestre disporase transporte gratuíto en autobús desde o centro da vila, para o cal será preciso reservar. Cómpre apuntar que o cartel deste evento é unha colaboración altruísta de Siro López inspirándose na imaxe citada anteriormente.