20190830. A veciñanza de Castiñeiras continúa loitando contra a instalación dunha depuradora de mexillón no porto desta parroquia ribeirense.
Os afectados manifestan que non se opoñen a este tipo de instalacións nin a calquera outro tipo de empresa na comarca, pois “fan falla postos de traballo”, pero consideran que “haberá que mirar o lugar máis idóneo para a ubicación da mesma.” O colectivo engade que, se vai adiante este proxecto, desaparecerá o areal que hai no lugar, coñecido como ‘praia das monxas’.
Tamén sinalan que continúan mantendo xuntanzas frecuentemente, así como recollendo firmas. De feito, indican que están preto das 1500.
Ademais, anuncian que están agardando “dende hai máis de 15 días ” para manter un encontro co alcalde de Ribeira, Manuel Ruiz, e “expoñerlle a nosa preocupación. Seguimos agardando…” Así mesmo, teñen solicitada unha reunión con Portos de Galicia e “non imos parar até que se nos dean as explicacións e xustificacións oportunas para a concesión desta licencia que atenta claramente contra o medioambente, a nosa paisaxe i o sentír de todo o pobo de Castiñeiras” porque entenden que “é unha vulneración do noso benestar, do ben común e do patrimonio xeral, para o único beneficio dun particular.”
