20190819. Numerosa veciñanza da parroquia ribeirense de Castiñeiras concentrouse este sábado co obxectivo de expresar o seu rexeitamento ao proxecto de implantación dunha depuradora de mexillón no porto. Tal e como declararon os asistentes, “prexudicará á maioría da poboación de Castiñeiras, prexudicará ás nosas praias, prexudicará un banco marisqueiro.” Ademais, engadiron que supón a “destrución do entorno”, xa que sinalaron que se están rompendo as rochas do monte do Castro “para beneficio dun particular” e estase procedendo a un recheo invadindo litoral rochoso, deteriorando así a imaxe da paisaxe. Os presentes tamén indicaron que non viron o informe do impacto ambiental “que para esta zona debería ser ríxido e completo nas súas esixencias. Deteriorase o dominio público para beneficio privado.”
Esta mobilización vén dada tras unha reunión celebrada na Casa da Cultura desta localidade, onde era palpable o malestar veciñal tanto pola construción da citada instalación coma polo descoñecemento das súas características e magnitudes, así como a repercusión no funcionamento do peirao.
