20190801. O conselleiro de Sanidade, Jesús Vázquez Almuiña, anunciou que, nas vindeiras semanas, poderá estar en funcionamento unha parte do novo Servizo de Urxencias do Hospital da Barbanza. Almuiña visitou hoxe o centro sanitario para coñecer o desenvolvemento desta primeira fase das obras de ampliación da área de Urxencias, que está a piques de rematar.
Nesta primeira fase, os traballos consistiron nun crecemento das urxencias ocupando o espazo anteriormente utilizado como acceso único, así como da execución da cuberta da zona de ampliación. Nesta zona distribúense os novos accesos diferenciados para padiolas e público, zona de espera de familiares e de pacientes, zona de admisión, dúas consultas, e unha zona para padiolas e cadeiras de rodas.
A ampliación da área de Urxencias deste hospital conta cun orzamento de 1’6 millóns de euros. A obra permitirá contar cunha superficie construída de 1.097’70 metros cadrados, dos cales 806’30 serían útiles. Unha vez se execute esta intervención, poderase incrementar a actual dispoñibilidade de camas de observación na área de Urxencias do Hospital, tendo en conta a demanda de dito servizo, para facilitar a actividade dos profesionais e en beneficio dos pacientes.
A actuación suporá un novo esquema funcional por bandas que consta de dous accesos diferenciados, o acceso principal de urxencias e outro acceso exclusivo para padiolas, con circulacións separadas.
A zona máis ambulatoria queda situada cara o acceso principal na fachada leste, mentres que a zona de boxes lévase cara a área máis privada na fachada oeste. A sala de observación, con máis de 100 metros cadrados, xunto co control de enfermería, queda no centro da nova área, de maneira que funcione como centro neurálxico, limitando as circulacións e mantendo un control total de todo o conxunto.
Ademais, para garantir a estanquidade e comportamento térmico de todo o conxunto, substituirase a impermeabilización da cuberta orixinal e executarase unha nova solución de cuberta para toda a actuación.