20190801 O Concello de Rianxo está a organizar este verán unha actividade divulgativa sobre astronomía, co engadido extra de que non se esixe a visita obrigada a ningún centro de observación específico: o centro de observación é o propio paseo local da Ribeira, a carón do busto de Castelao. A actividade, inserida en Rianxo Ciencia, inclúe dúas sesións divulgativas: a primeira desenvolveuse onte, 31 de xullo, e a seguinte será o vindeiro martes, 6 de agosto.
As quedadas, que comezan á noitiña (sobre as 22.30 horas) servirán para ampliar o noso coñecemento sobre os elementos que están alén da bóveda celeste: os planetas do noso sistema solar, as estrelas duplas, os cúmulos estelares, etc. As actividades, que poden verse adiadas se as condicións do clima non son as máis favorábeis para a observación, veñen da man do Concello de Rianxo, Rianxo Ciencia, a Universidade de Santiago e maila Xunta.