20190802. Esta semana tivo lugar o primeiro pleno ordinario do mandato de Ribeira, no cal non foi aprobada, tal e como fora exposta, a proposta do PBBI relativa a destinar os cartos da dedicación parcial, á cal renunciou o partido, á oferta con carácter gratuíto ou bonificado das prazas nos aparcamentos subterráneos ás persoas que realizasen compras ou consumicións nos establecementos comerciais e hostaleiros de Ribeira. De feito, só saíu adiante coa emenda presentada polo PSdeG-PSOE.
Segundo manifestou Vicente Mariño de Bricio, “aínda que dita emenda fose aceptada, desde o PBBI entendemos que se trata dunha proposta que desvirtúa por completo a nosa iniciativa, que busca un obxectivo diferente.” Engade que a súa formación pretendía que a medida se aplicase de maneira inmediata, “mentres que a do puño e a rosa non fai máis que retrasar a entrada en vigor e aplicación deste tipo de incentivo dirixido aos veciños coa referida partida económica, xa que supón a elaboración dunha ordenanza e un plan de comercio que non son máis que trámites burocráticos que se dilatan no tempo e que van en contra dos intereses dos ribeirenses.”
Ademais, o PBBI expresa que os socialistas non exercen así a oposición, pois entenden que está favorecendo o traballo ao grupo de goberno. Tamén consideran que o PSdeG-PSOE está equivocado se pensa que coa dedicación parcial pasan a formar parte do goberno municipal.
Finalmente, afirman que esta dedicación parcial “é un disfrace co que se oculta a compra de apoios do PSOE e BNG polo goberno que encabeza o señor Manuel Ruiz Rivas, tal e como sospeitamos desde o principio.” Deste xeito, pídenlle aos socialistas e nacionalistas que “recapaciten e pensen nos veciños en vez de encher os seus petos co diñeiro que lles da o alcalde, e que se dediquen a facer oposición ao goberno e non ao resto de grupos da oposición.”