20190813 Este mes de agosto o Pazo-Torre de Goiáns comezou o seu proceso para saír definitivamente da listaxe de bens seriamente ameazados que elabora na Rede a Asociación Hispania Nostra con toda a tristemente abondosa riqueza patrimonial en fase de esborrallamento e derrube. E fíxoo co comezo das obras para a súa restauración, unhas obras que arrincan, iso si, coa constatación de que non vai ser posíbel salvar boa parte da estrutura interna, xa que o mal estado do edificio, e a caída recente do tellado, obrigaron a baleiralo e, agora, comezar case dende cero no predio principal e máis na torre. Iso si, segundo nos lembran dende Historiadegalicia.gal, algúns elementos interiores si que se van poder recuperar, por exemplo as reixas e as escaleiras de ferro orixinais, que foron desmontadas e acubilladas hai xa un tempo nun almacén municipal, á espera das obras de recuperación que comezaron este mes.
Se os prazos se cumpren, as obras, que están a ser desenvolvidas pola UTE Proyecon Reboben González, poderían estar rematadas na súa totalidade en outubro de 2020. Os traballos poñen o foco na rehabilitación integral da vivenda e da torre, onde non se conservan nin os forxados nin, como dixemos, as teitumes.
A contía dos labores a realizar, que se estenderán a longo do vindeiro ano e medio, será de 990.850 euros. O proxecto inclúe o mantemento e conservación da feitura orixinal das escaleiras, os muros e a balaustrada.
O financiamento dos traballos foi posíbel grazas a un préstamo sen intereses solicitado polo Concello de Boiro ao Fondo de Cooperación do Instituto Galego da Vivenda e Solo (IGVS), que deberá ser devolvido durante oito anualidades (131.000 euros ao ano).
Compromiso do actual equipo de Goberno
O novo Goberno local de José Ramón Romero García, Martiño, manifestou recentemente que apostará decididamente pola esperada rehabilitación e posta en valor da torre-pazo, pero cunha serie de novidades moi salientábeis. Para comezar, ten previsto un estudo para declarar tanto o edificio como á súa relevante contorna natural e paisaxística Ben de Interese Cultural (BIC).
En termos máis concretos, o novo alcalde comunicou a O Barbanza a intención do Concello de “manter a estrutura existente e dar tamén os primeiros pasos para devolver ao xardín o esplendor de antano”, ao que se sumaría unha nova liña de actividade que estaría directamente encamiñada a xerar oportunidades formativas para os colectivos locais: “Vemos moi interesante fomentar os obradoiros de emprego neste espazo”.
Entre as tarefas pendentes, recoñece Martiño, tamén figuraba a de “estudar a remodelación do equipo de Goberno anterior, xa que a modificación das paredes interiores e o tellado non foi acertada”.