20190816. Despois de que o salón de plenos do Concello de Ribeira acollese o pasado 9 de agosto a presentación do libro póstumo de Plácido Betanzos, Relatos e lembranzas, agora tócalle a quenda a Palmeira, o pobo natal do mestre, político e escritor. Así, a Sociedade Fillos de Palmeira será escenario deste acto o vindeiro martes, 20 de agosto, ás 21.00 horas. Unha data significativa para a posta de longo desta publicación, pois coincide co día do aniversario de Plácido.
Impresa pola Imprenta Provincial da Deputación da Coruña e editado pola Comisión Homenaxe a Plácido Betanzos García, esta obra reúne artigos seus, algúns deles inéditos e outros publicados en diversos medios de comunicación, así como textos sobre el realizados por outras persoas ou comentarios dos seu alumnado, entre outros.
No acto intervirán o alcalde de Ribeira, Manuel Ruiz; Sofía Betanzos, filla de Plácido; a ex-vicepresidenta da Deputación da Coruña, Goretti Sanmartín; e membros da comisión coma José Alberto Fernández, Manuela Gago, Pilar Sampedro e José Luis Torres.
Pilar Sampedro tamén se encargará de presentar e moderar esta cita, a cal incluirá un recital da poetisa Marta Pedrosa acompañada musicalmente de José Luis Olveira.