Hoxe martes desenvolverase na praia da Lombiña e nos areais lindeiros a actividade de concienciación contra os restos de tabaco nos areais programada inicialmente para o pasado 11 de agosto e que, por mor do aviso de mal tempo, adiouse na espera dun parte meteorolóxico menos adverso. A actividade Praias limpas de cabichas, desenvolvida polo Concello da Pobra, consistirá nunha campaña de sensibilización sobre a importancia de non guindar os filtros do tabaco nas praias, depositándoas nos acubillos axeitados.
A acción levarase a cabo a pé de praia, hoxe pola tarde (entre as 17.00 e as 20.00 horas), nas contornas da Lombiña, da Illa e máis da Corna. Repartiranse de maneira gratuíta cinceiros portátiles para evitar o depósito dos refugallos do tabaco nos areais, uns residuos contaminantes que tardan unha chea de anos en degradarse e que presentan, na súa descomposición, importantes riscos para o medio e para a nosa saúde. De feito, sábese que persiste no tempo en micropartículas logo de descompoñerse e que cada filtro do tabaco pode contaminar entre 8 e 10 litros de auga de mar e até 50 litros se se trata de auga doce.
O Concello lembra que no caso de non estarmos nas praias na tarde do domingo, tamén podemos acudir á Casa Mariñeira ou á Oficia de Medio Ambiente do Concello para solicitar o noso cinceiro portátil.