20190808 Este venres 9 de agosto celebrarase a tradicional cea de socios do Club Náutico de Riano, unha xa histórica cita estival de confraternidade que virá precedida pola regata de membros da entidade que se celebra a partir das 15.00 horas. A cea, un clásico nas actividades do club, será no restaurante Tialena, na propia vila de Rianxo. Segundo apunta o club, todo indica que a celebración, igual que en anos anteriores, contará con “gran afluencia de asistentes, entre socios e amigos”.
O club tamén explica que este tipo de actividades “son un clásico” do programa anual do club, e teñen moi boa acollida entre os membros e, tamén, entre a súa ampla rede de amizades e seareiros dos deportes náuticos. “En moitas ocasións, a cea convértese na cita anual daqueles que estando fóra da vila, reencóntranse e comparten actividades náuticas e culinarias”.
Polo que respecta á rega prevista para a tardiña, consistirá nun percorrido costeiro a designar polo comité de regatas cun obxectivo fundamental: incentivar a participación de todos os socios nas actividades náuticas do club.