20190802. Ante a celebración no día de mañá da tradicional procesión marítima na honra da Virxe do Carme con Misa, ás 18.30 horas, na nova lonxa cantada pola Coral do Círculo Mercantil e Industrial de Ribeira e posterior embarque das imaxes da patroa e de San Pedro no Boteira Primero, vai recalar no peirao de Santa Uxía o buque de salvamento SAR Gavia para participar na comitiva acuática.
Con tal motivo, en horario de mañá vanse celebrar visitas guiadas de balde para que tódolos que o desexen poidan coñecer as interioridades deste remolcador de 39’7 metros de eslora. Terán lugar de 09.30 a 13.30 horas e por razóns de seguridade, pois o buque estará atracado no peirao comercial, para poder acceder hai que tomar un microbús que estará emprazado diante da barreira.
Por outra parte, a plataforma flotante para o lanzamento dos fogos artificiais do domingo de festas cambia de sitio. En lugar de estar situada á altura da nova lonxa, estará fronte á casa do mar, obedecendo a razóns de seguridade. Deste xeito, os emprazamentos máis acaídos para a súa contemplación estará conformado polo entorno do miradoiro do Malecón, paseo do Touro, praza Pedra Pateira e acceso ao peirao comercial.
Ademais, o inicio do espectáculo pirotécnico adíase quince minutos sobre a hora inicialmente prevista, será ás 00.15 horas, para que os asistentes ao concerto previo de Miradoiro na praza de España poidan dispoñer de tempo para desprazarse unha vez conclúa a actuación.
