20190823. O pleno extraordinario celebrado hoxe sacou adiante diversas propostas para a poboación ribeirense. Unha das máis destacables era a xestión da Estación de Depuración de Augas Residuais (EDAR). Os nacionalistas presentaran unha emenda que se aprobou cos únicos votos en contra do PBBI, “para salvagardar os intereses da veciñanza.” Neste punto, o BNG manifestou que se congratula “de ter sacado adiante unha proposta moi positiva para a veciñanza e que salvagarda os seus intereses mellorando as garantías que se deben tomar antes de recepcionar unha instalación que xera e xerou tantos problemas ambientais e sociais.”
Durante a súa intervención, o concelleiro nacionalista, Luís Pérez Barral, fixo unha análise que “explica as causas dos problemas que tivo a EDAR e achegou unha solución que é moi beneficiosa desde o punto de vista económico como social.” A proposta do BNG pasa por facer unha auditoría externa de toda a infraestrutura de depuración, alén da que faga a Xunta e a empresa, antes de que o Concello de Ribeira reciba a obra.
Ademais, para garantir unha correcta xestión, o BNG sinala a “aposta por constituír unha empresa pública que pase a xestionar a EDAR e a partir de 2024 tamén colla o servizo de abastecemento e saneamento de augas.” Tal e como apuntan os nacionalistas, os beneficios desta empresa volverían ás arcas municipais “podendo reinvestilo na rede ou en necesidades da poboación.”
Así mesmo, o BNG quixo trasladar publicamente que “seguiremos vixiantes nesta cuestión e que non toleraremos a recepción da instalación sen as garantías suficientes que conclúan que a obra está realizada correctamente e o seu funcionamento non provoca ningún problema.”
