20190816. O BNG da Pobra do Caramiñal conmemorará o Día da Galiza Mártir cunha dupla actividade. Así, o domingo 18, ás 12.00 horas, procederase a unha ofrenda floral na confluencia das rúas Alexandre Bóveda e San Roque. Posteriormente, desprazarase ata a zona do Pozo, nos arredores da fábrica de conservas, para honrar a memoria dos represaliados polo franquismo que sufriron prisión no campo de concentración mantido naquelas instalacións durante, cando menos, todo o ano 1939.
No esteiro dos ríos Pedras e Lérez, fronte ás ruínas da central de enerxía eléctrica que representa o pasado industrial do municipio, “o franquismo erixiu un monumento á barbarie, ao terror, á morte, un campo de concentración que mantivo encerradas a unhas 1.000 persoas de xeito estábel, incluso cando a guerra xa rematara”, tal e como manifestaron os nacionalistas.
Así mesmo, engadiron que “en condicións non aptas nin para as bestas, a carrexe franquista tratou de crebar as vidas e as conciencias de centos de persoas cuxo único delito era crer na democracia e na igualdade.”
Desta maneira, con estes actos pretenden manter viva a lembranza “dos sacrificados, dos que perderon a guerra.”
