20190814. Con motivo das últimas opinións expresadas polo rexedor de Vigo, Abel Caballero, en relación á candidatura Cíes-Illas Atlánticas como Patrimonio da Humanidade, o alcalde de Ribeira, Manuel Ruiz Rivas, no nome do Goberno do Concello ribeirense, quere reiterar a súa postura para que a Xunta de Galicia se manteña na intención de solicitar esta declaración para todas as illas que integran o Parque Nacional.
Así, expresa que “lamentamos a insolidariedade do alcalde de Vigo posto que, sen cuestionar a singularidade propia das illas Cíes -singularidade que motiva de feito que o seu topónimo figure de forma expresa no título da candidatura-, entendemos que o resto de illas e arquipélagos do Parque posúen tamén uns valores propios que xustifican por si mesmos a súa inclusión.” Neste senso, considera que a potencialidade e valor global que reúne a candidatura conxunta das Illas Atlánticas “é moi superior a unha candidatura única das Cíes, e valores medioambientais como os que acredita Sálvora non atopan parangón no resto do Parque Nacional.”
Por esta razón, Ruiz Rivas solicita do alcalde de Vigo unha rectificación e que non inclúa “nas súas pelexas coa Xunta posturas ilóxicas e irrespectuosas con outros Concellos como as que está mantendo.”
Estas declaracións veñen dadas despois de que Abel Caballero se amosase crítico coa candidatura presentada polo Goberno autonómico, expresando tamén o seu apoio á veciñanza de Ons, que colocou pancartas co lema ‘Patrimonio Humanidad: NO; Derechos Isleños: Sí’, sen descartar manter unha reunión.
