Magín Blanco e a Banda das Apertan recalarán na Pobra

20190807. O pobrense Cantón da Leña acollerá mañá, ás 20.30 horas, o espectáculo de Magín Blanco e a Banda das Apertas. Nesta ocasión o creador de A nena e o grilo, Magín Blanco (voz, guitarra), estará acompañado polos músicos María Faltri (voz, percusión), Jorge Juncal (piano, acordeón) e Jerry Noia (guitarras, baixo) ao que se acaba de sumar Jesús Lorenzo (batería).

Xuntos irán repasando as aventuras de A nena e o grilo, descubrindo así os seus segredos a través de cancións. As aventuras inciden directamente en temáticas esbozadas nas entregas de Magín Blanco ao público infantil, tanto na publicada no 2010 de A nena e o grilo no país das apertas coma na do 2012 de A nena e o grilo nun barquiño, asícomo do recentemente estreado Gatuxo, pasando tamén por outras publicacións coma María Fumaça, Rosalía pequeniña e temas de nova creación.

As músicas irán viaxando polas singulares aventuras nas que se achegarán ao mundo desde a perspectiva mesma dos nenos: sinxela e xenerosa. Cun formato de concerto musical, as letras das cancións e as súas introducións  marcarán o ritmo desta proposta.

A entrada é de balde e a cita está organizada pola Concellería de Cultura da Pobra do Caramiñal en colaboración coa Rede Cultural da Deputación da Coruña. Se vai mal tempo, o espectáculo trasládase ao Teatro Elma.