20190807. A Casa do Concello de Rianxo acolleu esta tarde a presentación da cuarta edición do Trail Subida Pico Muralla que se celebrará o domingo 11. Esta cita deportiva tomará como saída a praza Virxe da Guadalupe e finalizará no pico máis alto mo municipio, no Pico Muralla. Así, o percorrido é de 15 quilómetros cun desnivel acumulado de 670 metros. Ademais do trail, os participantes poden optar pola andaina, que terá un itinerario similar. As saídas están previstas para as 10.30 e 08.30 horas, respectivamente.
No acto estiveron presentes a primeira tenente de alcalde de Rianxo, María del Carmen Figueira; o concelleiro de Deportes, Xusto Ordóñez; o presidente de Barbantia Roda, Manuel Gómez; e as atletas María Jesús Rey, Alejandra Gómez e Lía Gómez.
O edil Xusto Ordóñez expresou o seu agradecemento a Barbantia Roda e indicou que este evento consta “dun esforzo e resistencia para os atletas que ano tras ano repiten a súa participación por dura que sexa a proba.” Tamén sinalou que unha das recompensas desta cita é a panorámica que ofrece a meta, así como os trofeos que se entregarán unha vez finalizada.
A primeira tenente de alcalde María del Carmen animou á xente a participar, agardando “responder a todas as expectativas e a todo o que sexa necesario para que esta proba se desenvolve da mellor maneira posible.”
Pola súa parte, o presidente de Barbantia Roda, Manuel Gómez, sinalou que para que este tipo de eventos deportivos se desenvolvan é preciso o factor humano, pero tamén o económico, neste caso, por parte do Concello. No que respecta á proba, manifestou que os primeiros 10 quilómetros transcorrerán á beira do río Te, sendo o traxecto máis suave, pero que os 5 últimos quilómetros son máis duros, especialmente os derradeiros 2 quilómetros “porque é onde máis sufre ese desnivel onde acadamos os 670 metros de altitude.” O avituallamento establecerase no quilómetro 10. Así mesmo, apuntou que nos últimos dous días notaron o incremento de persoas anotadas con ao redor de 110 inscritos tanto na andaina coma no trail.
Unha vez finalizada a proba, os participantes disporán de servizo de autobús que os achegará novamente a Rianxo, onde se procederá á entrega de trofeos por categorías aos corredores.
Existe un límite de 250 prazas para cada unha das modalidades, mais ninguén quedará sen participar, tal e como precisaron desde a organización. Os interesados dispoñen ata as 23.59 horas de mañá para inscribirse a través da páxina web www.emesports.es. Do mesmo xeito, poden solicitar información na oficina de Deportes de Rianxo ou mediante o enderezo electrónico barbantia.eventos@gmail.com. O prezo para andaina é de 3 euros e para o trail de 6 euros.
