Diversión e concienciación nos Sanjuerguines pobrenses

• 

• 

20190816. Mañá na Pobra do Caramiñal celebraranse os Sanjuerguines grazas ao labor da organización conformada por rapazas e rapaces do municipio. Así, os pasabares comezarán ás 11.30 horas e a festa da auga terá lugar ás 16.30 horas. As Olimpíadas Pincheiras serán a partir das 18.00 horas, constando actualmente de catro xogos. O primeiro é ‘o xigante mareado’ que consiste nunha carreira de relevos por parellas, onde dúas persoas, unha colocada enriba da outra, deberán transvasar a auga entre dous recipientes. A dificultade da proba reside en que antes de chegar ao recipiente receptor, a parella deberá dar unha volta sobre si mesma. O gañador será o primeiro equipo que consiga encher o envase de destino.

En segundo lugar, ‘o pincheiro máis letal’ é de carácter individual, intentando derrubar ao adversario sobre unha plataforma na auga. O único medio para logralo é coa axuda dun pau provisto de polietileno nos estremos, polo que a utilización de calquera outra práctica supón a descualificación do participante.

Seguidamente, a proba ‘in your face’ tamén é un relevo por parellas e trátase de transportar unha serie de globos de auga entre dous recipientes, gañando o equipo con máis cantidade nun tempo determinado. A única norma é que para desprazar os globos só se pode empregar a cara.

O ‘curling sanjuerguín’ é o último xogo do día e consiste en deslizarse por unha superficie esvaradía coa única axuda dun inchable, sendo o campión aquel que logre quedar o máis preto posible dun punto marcado ao longo da área.

Este ano están inscritas ao redor de 1.200 persoas que forman unhas 30 peñas. A súa composición é moi heteroxénea, algunhas chegan a 130 integrantes e outras son de apenas 10. Ademais, haberá desde rapazada ata familias con nenos, polo que a organización procura que a festa estea orientada a tódolos públicos, a pesar de que por razóns de seguridade os xogos sexan para maiores de 16 anos.

Por outra banda, desde a organización estase levando a cabo unha iniciativa de lixo 0, a cal consta de tres estratexias: redución ao mínimo na xeración de residuos a través da substitución de envases individuais na barra emprazada por outros recipientes de maior volume que permita máis usos e introdución da #marmita, vaso reutilizable que se disporá na barra; programa de concienciación mediante as redes sociais dos Sanjuerguines; e instalación coa colaboración do Concello de máis contedores na zona do festexo.

Así mesmo, este ano contarán cun programa de concienciación e protección contra a violencia de xénero baixo a campaña #Agresionoff, co obxectivo de que a celebración sexa un espazo libre de violencia de xénero, así como a habilitación dunha marquesiña como punto lila. Deste xeito, unha rede de voluntarias serán as encargadas de identificar e denunciar calquera tipo de violencia. Desde a organización indican que se puxeron en contacto un total de 60 rapazas dispostas a participar.