20190805 Once séculos de historia son moito tempo e cando unha localidade consegue chegar ao fito de atesourar tal cantidade de relatos e acontecementos, cómpre celebralo ao grande. Nestas anda Corrubedo (Ribeira), que logo das importantes e abraiantes contribucións fotográficas das veciñas e veciños ao blog corrubedo11siglos.org (e ao proxecto municipal O Labor en Silencio) e das charlas históricas das que dimos conta dende O Barbanza, prepara para os días vindeiros un gran xantar colectivo (o 25 de agosto) e máis a nova edición da súa Carreira Popular. Esta última non será unha competición calquera: será a carreira de celebración dos máis de 1.100 anos de historia da localidade. Un aniversario que, de certo, non seu cumpre todos os días.
O acontecemento deportivo, que vén da man da Asociación Corrubedo XI Séculos coa colaboración da ACDC O Cabo e do Concello de Ribeira, ten o engadido extra de constituírse nun percorrido por unha das contornas marítimo-terrestres de meirande beleza da xeografía galega: 11,3 quilómetros de trazado pola península de Corrubedo e abeirando a vertente máis salvaxe, as praias e os cantís, e tamén a contorna do faro e máis a vila.
Coincidirá no tempo (o 15 agosto) coa celebración da patroa, Santa María. As inscricións están abertas até o día 13, tal e como lembran os carteis que xa están repartidos por todo o concello de Ribeira, e pódense formalizar a través da páxina Galitiming. A carreira está aberta á participación de corredores de dezaseis anos en adiante, distribuídos nas categorías de xuvenil, elite e veteranos (A, B e C). Para as e os deportistas de idades comprendidas habilitarase un itinerario de 1.500 metros, de 1.000 metros para as nenas e nenos de 9 a 11 anos, de 200 metros para os de 6 a 8 anos, e de 100 metros para os de 0 a 5 anos.
A proba ten o seu punto de partida no porto, ás 10.00 da mañá.