Colle corpo a transformación verde da antiga estación de buses de Ribeira

20190827 As obras para converter a antiga estación de autobuses de Ribeira nunha área axardinada, humanizada e de lecer, van collendo impulso este mes de agosto, sendo posíbel, a estas alturas, albiscar boa parte do resultado final (cunha importante ampliación da beira máis próxima ao fogar dos maiores e cos espazos para acubillar a vexetación ornamental perfectamente delimitados). A día de hoxe, ademais, non se obriga aos viandantes a circular arredor do espazo da obra, rodeándoa pola súa beira marítima, senón que é posíbel cruzar a contorna polo seu centro, máis comodamente.

As obras, xa avanzadas, están a ser desenvolvidas pola empresa Canarga, adxudicataria da reforma integral da fachada marítima de Ribeira. Os traballos poñen o punto e final á estación de autobuses construída a principios da década dos noventa, sobre o recheo que sepultou a antiga praia de Colomer. O certo é que a estación estaba a dar sinais claros de deterioro e resultaba evidente que precisaba unha reforma ou, tamén, a súa eliminación e traslado (como finalmente aconteceu), xa que todas as cristaleiras que forman parte da construción, dándolle corpo, estaban esnaquizadas.

Agora o espazo será ocupado por unha zona verde con árbores que complemente e dea continuidade ao miradoiro recentemente inaugurado, coas xa célebres letras de Ribeira en diferentes cores, no principio do paseo do Touro. A contorna intervida tamén servirá de punto de unión entre o carril bici do dito paseo e o que cruza o porto de Ribeira en dirección As Carolinas e Coroso.

A nova estación estará emprazada noutro recanto do Malecón, fronte á praza de Abastos. O proxecto é obra do arquitecto Carlos Seoane e constará dun edificio formado por madeira, granito e aceiro e unha cafetería. O custe é de 300.000 euros.