20190814. O Instituto para a Calidade Turística Española (ICTE) concedeulle a renovación da marca Q de Calidade Turística ás praias de Mañóns, Carragueiros e A Retorta do municipio boirense. Este distintivo concédeselle a aquelas praias que cumpran uns niveis de calidade nos servizos que prestan aos usuarios, medidas de seguridade e hixiene, así como outras que pretenden minimizar o impacto que xera a actividade turística sobre o litoral.
Este distintivo é o principal indicador de garantía do Sistema de Calidade Turística Española (SCTE) que concede o citado organismo co respaldo da Secretaría de Estado de Turismo do Ministerio de Industria, Turismo e Comercio. De feito, a concelleira de Turismo e Medio Ambiente, Marisa Collazo, expresou que “as praias do litoral de Boiro son un dos principais atractivos turísticos do noso concello, por iso apostamos polo mantemento e mellora constante dos nosos areais.”
Desta maneira, son moitos os servizos e persoal encargado da xestión das praias, así como aqueles que se dedican á súa limpeza e mantemento, á súa conservación e aos servizos para ofrecer aos usuarios a máxima satisfacción no desfrute dos areais e de tódalas actividades que se poden desenvolver nos mesmos. Así, a edil recoñeceu que “este verán tivemos unhas condicións climatolóxicas adversas pero estamos coordinando os equipos de limpeza de praias para actuar o máis rápido posible.”
Despois do temporal da pasada fin de semana os areais quedaron ateigados de residuos orgánicos traídos polo mar. Por esta razón, organizáronse aos equipos de limpeza encargados das praias para que actuaran sobre as mesmas no menor tempo posible. A climatoloxía que se agarda para os vindeiros días tamén é adversa, polo que o Concello está a traballar xa por coordinar a limpeza das praias e que volva ser tan efectiva como o foi esta semana.
O municipio de Boiro conta con moitos quilómetros de litoral, na súa maioría na franxa sur, a máis afectada cando as condicións climatolóxicas son adversas. O persoal de limpeza só pode actuar nos areais durante catro horas ao día, de 08.00 a 12.00 horas, e os recursos dos que se dispón son limitados. A concellería de Medio Ambiente sinala que están traballando por organizar ao persoal encargado da limpeza das praias, incluso con algún reforzo, para que os areais queden limpos no menor tempo posible e os usuarios poidan desfrutar das praias.
