20190820. A Asociación TDAH Comarca do Salnés abrirá unha delegación para a zona do Barbanza na Casa da Cultura de Aguiño ‘Manuel Ayaso’. Esta acción formalizouse coa firma dun convenio de colaboración entre a citada institución e o Concello de Ribeira.
A sinatura tivo lugar esta mañá no Consistorio entre o alcalde Manuel Ruiz e Eva María Silva Noal, en representación da asociación.
O acordo materialízase na cesión dun despacho situado na casa aguiñense para favorecer a realización das actividades propias desta entidade sen ánimo de lucro, formada por pais, nais e familiares afectados polo Trastorno por Déficit de Atención e Hiperactividade (TDAH), así como adultos doentes deste e outros trastornos asociados.
En concreto, os membros da asociación atenderán de xeito especializado a persoas afectadas, proporcionándolle as terapias e apoios que necesitan, ademais de dar formación e información. Así mesmo, darán visibilidade ao trastorno ao tempo que se defenden os dereitos das persoas con hiperactividade ou déficit de atención e á integración das mesmas na sociedade.
Dito despacho será cedido de luns a venres, en horario de 15.00 a 21.00 horas. O prazo da cesión establécese por dous anos, prorrogables ano a ano ata un máximo de cinco.
Rebeca Cameán, presente na firma ao igual que a concelleira de Servizos Sociais Ana Ruiz, e Pilar García exercerán de delegadas no Barbanza.
