20190820 Semella que a costa de Galicia, e a nosa contorna tamén, está a contar este verán cunha inusualmente abondosa presenza de quenllas, prionace glauca polo seu nome científico. Trátase de pequenos tabeiróns, de curta envergadura aínda (arredor de medio metro de lonxitude), que adoitan achegarse a augas de escasa profundidade na procura de alimento. Segundo lembra a Coordinadora para o Estudo dos Mamíferos Mariños (CEMMA), soen ser exemplares xuvenís que non revisten ameaza algunha para o ser humano, posto que rara vez se achegan a nós ou a calquera animal que sexa máis grande ca eles.
Con todo, a organización galega achega unha serie de consellos por se se dese o caso de atoparnos cunha quenlla nas praias: cómpre deixar que marchen polos seus propios medios e, de non facelo porque están varadas ou por calquera outro motivo, nunca collelas pola aleta caudal se o que queremos é devolvelos ao mar. En calquera caso, o máis aconsellábel é sempre alertar aos socorristas que están máis preto ou ao servizo de emerxencias 112 ou á Rede de Varamentos do CEMMA cunha chamada (ou un Whatsapp con foto) ao número 686989008.