20190814 As lonxas galegas do futuro (un futuro a medio e curto prazo) serán máis intelixentes e sustentábeis. Baixo esta premisa e co gallo de presentar detalles sobre o proceso de transformación pesqueira, a Consellería do Mar anunciou onte, dende a lonxa de Porto do Son, que as máis recentes axudas do departamento buscan reducir nun 40% o consumo anual destes recintos portuarios pesqueiros. A contía total das subvencións ás confrarías, que buscan modernizar o equipamento interior con tecnoloxía LED (e coa incorporación de sistemas de control de acendido e de regulamento da intensidade da luz), será de 250.000.
Así o fixo saber a conselleira Rosa Quintana dende a devandita vila de Barbanza, cuxa lonxa está adherida ao devandito programa de axudas: contou cunha achega de 5.000 euros para levar a cabo actuacións de substentabilidade na contorna das poxas (actuacións como a incorporación de LED), que fixeron posíbel un aforro do 75% en materia de consumo eléctrico.
No marco desa convocatoria resolta, a confraría de Porto do Son tamén recibiu unha axuda de 11.090 euros para adquirir preto de 30 contedores isotermos de distintos tamaños para o almacenamento e transporte de xeo.
As confrarías de pescadores interesadas en solicitar estas axudas poderán consultar os requisitos e a documentación necesaria na orde publicada onte no Diario Oficial de Galicia. Ademais para documentación que deben achegar coa solicitude, entre ela a memoria de proxecto, poden consultar os modelos na ligazón específica habilitada da web da Consellería do Mar.
