20190819 En marzo a nosa comarca viuse asolada por un dos peores lumes que se recordan: un incendio que comezando en Dodro, estendeuse logo cara o corazón de Barbanza levando por diante, coa súa destrución, boa parte dos montes de Rianxo, entre os que se contaron múltiples hectáreas de eucalipto, pero tamén de bosque autóctono. En total, 1.000 héctareas. O panorama desolador, que pode ver calquera que se achegue ao concello e que ficou a rentes dos principais núcleos de poboación, está a ter unha resposta enérxica e exemplar da cidadanía. Concretamente da comunidade de voluntarias e voluntarios da asociación Verdegaia, que os días pasados fixeron labores de erradicación de eucaliptos nos montes do Castro de Bexo, en Dodro. As Brigadas Deseucaliptizadoras volveron mover ficha.
Segundo conta Verdegaia no seu Facebook, os traballos consistiron basicamente en eliminar os rebrotes da devandita especie invasora nas zonas afectadas, unha especie que, como lembraremos, é pirófita e inza e faise forte coa destrución xerada polo lume. Na cita, baixo o berro Lumes nunca máis! participaron medio cento de brigadistas voluntarios, en colaboración coa Comunidade de Montes da Cruz do Avelán, o Concello de Dodro, a Asociación Veciñal San Xoán de Laíño e a Asociación Cultural Unidade Veciñal de Dodro.
Segundo lembran dende Galicia Confidencial, o Castro de Bexo tamén se coñece como As Murallas, e está catalogado por Patrimonio polo seu importante valor etnográfico, cultural e natural, e por ser un dos asentamentos máis grandes da contorna. A acción deseucaliptizadora desta fin de semana ten a súa orixe na confluencia entre as brigadas de Verdegaia e os integrantes da Comunidade do Monte Veciñal en Man Común da Cruz do Avelá, entre cuxos obxectivos figura a posta en valor do asentamento cun proxecto de xestión arqueolóxica que contempla a erradicación do eucalipto na súa contorna.
