A xerencia sanitaria compostelá destina 80.000 euros a obras no PAC de Boiro

13 Agosto 2019
Cedida por Sergas

20190813. As obras da primeira fase de ampliación e reforma do Punto de Atención Continuada (PAC) de Boiro acaban de rematar grazas a un orzamento de 80.000 euros. A xerente de xestión integrada de Santiago, Eloína Núñez, acompañada por membros do equipo directivo da área sanitaria, visitaron as novas consultas e a sala de observación que xa están operativas. No percorrido estiveron coa xefa do servizo, Julia Rey, e coa coordinadora de enfermería do Centro de Saúde de Boiro, Elena Graña.

Trátase dunha reforma integral que afecta a unha superficie de 260 metros cadrados e que ademais suporá un incremento de espazo dedicado á actividade asistencial. As obras afectarán tanto á parte de traballo coma á de estar do persoal do PAC, executándose en fases consecutivas para “interferir o menos posible no normal funcionamento das urxencias.”

A dixitalización por parte do Sergas, así como as melloras sanitarias permiten poñer a disposición os antigos espazos dedicados a arquivo das historias clínicas. Segundo fontes do Sergas, “ademais de adecuar os novos espazos, na reforma se intervén no resto da áreas aplicando melloras na distribución, nos acabados e nas instalacións, e moi especialmente na renovación das instalacións eléctricas, e da carpintería.”

Na xa finalizada primeira fase, acondicionáronse 3 espazos de atención sanitaria. Un deles, destinado a observación permitirá a monitorización e a estabilización dun doente en estado crítico antes de proceder ao seu traslado a un centro hospitalario, así como a administración dun tratamento médico que requira que o doente permaneza en observación durante un tempo no centro de saúde. Tamén se rematou o acondicionamento, totalmente renovado, de dúas consultas.

Na segunda fase habilitarase unha nova consulta de enfermería, nun espazo anteriormente dedicado a espazo administrativo do centro de saúde. Así mesmo, actuarase para dotar ao centro de saúde dun terceiro posto de atención administrativa directa ao público.

A terceira fase afectará ás antigas consultas médicas para habilitar o espazo definitivo de recepción de doentes, facilitando un punto claro de atención aos doentes e xerando un espazo de espera de acompañantes.

Outros artigos

Publicidade

Revista en papel

Opinión

“Cadaquén coa súa idea”. Luís Celeiro

“Cadaquén coa súa idea”. Luís Celeiro

Fóronse onte pola madrugada e arestora aínda non chegaron. Montaron nun avión para ir a “non seionde” e, despois, un tren de longo recorrido levaríaos a outro aeroporto,  para seguir o seuprograma de turismo ofertado por unha das máis importantes axencias de turismo...

“Good morning, Baltimore”. Antón Luaces

“Good morning, Baltimore”. Antón Luaces

Este xoves foron recuperados outros dous cadáveres supostamente doutros tantos obreiros da maior infraestrutura marítima de Baltimore, considerada a de máis lonxitude de Estados Unidos, que foi derrubada o pasado martes polo portacontedores "Dalí", que bateu contra a...